குருதிச்சோகை (உதயன் பத்திரிகை 23.07.2014)

வயிற்றுப் புண் - 26.11.2013 உதயன் பத்திரிகையில் இருந்து.

மலச்சிக்கல் - 07.12.2013 உதயன் பத்திரிகையில் இருந்து.

செகராசசேகரத்தில் வாதரோகங்கள் .... 06

நேத்திர வாதத்துக்கு எண்ணெய்

“தருமருவு நன்னாரிமுத்தக்காசு

தங்குமிருவேலிமுள்ளி சீந்தில்பூலா

திருமருசீதேவியோரி தட்சூதின்வேர்

திருந்துமிலாமிச்சு சிற்றாமட்டிவேரும்

குருமருவுதாமரையின் வளையச்சாறுங்

குலப்பசுப்பாலுடனிளநீர்சாத்தாவாரி

கருமருவுமொசுமொசுக்கை பொன்னாங்காணி

கதித்தகையான்றகரைசதாபலத்தின் சாறே”

நன்னாரி, கோரைக்கிழங்கு, இருவேலி, நீர்முள்ளி, சீந்தில்கொடி, பூலா, சீதேவியார்பூடு, ஓரிதழ்தாமரை, இலாமிச்சை, சிற்றாமட்டி, தாமரைவளையச்சாறு, பசுப்பால், செவ்விளநீர், சாத்தாவாரிச்சாறு, மொசுமொசுக்கைச்சாறு, பொன்னாங்காணிச்சாறு, கையாந்தகரைச்சாறு, எலுமிச்சம்பழச்சாறு, இவைசாறு வகை ஒருகொத்து (600மிலீ) வேர்களை தனித்து எடுத்து.

“சாறுபசுப்பாலிளநீர் புளியோர் கொத்துத்

தனிமிளகு மூன்றுபலமவித்த தண்ணீர்

வீறுபசு நெய்யுடன் கோட்டமேலம்

விளம்பிரு சீரகமரத்தை திற்பல்தான்றி

தேறுபசுங்கிளியூறல் மலையில்வேலி

செண்பகப்பூசதகுப்பை கராம்புவாசி

கூறுகுண்டுரோசனைகுங்குமப்பூசந்நங்

குலவசமோதகம் சாதிமதுரமாமே”

தனி மிளகு மூன்றுபலம் எடுத்து கசாயம் செய்து மேற்கூறிய சாற்றுடனும் இளநீர், பசுப்பாலுடனும் கலந்து இவற்றுடன் பச்சைநெல்லிக்காய், கருங்கோட்டம், ஏலம், கருஞ்சீரகம், நற்சீரகம், சித்தரத்தை, திற்பலி, தான்றி பச்சைக்கிளியூறல், பங்கம் பாளை, செண்பகப்பூ, சதகுப்பை, கராம்பு, வசுவாசி, கோரோசனை, குங்குமப்பூ, சந்தனம், ஓமம், சாதிக்காய், அதிமதுரம், இவை வகைக்கு ஒரு கழஞ்சு.

மதுரசாரக் கிவையொன்றோர் கழஞ்சு வாங்கி

மதிக்கவேருடனரைத்துக் கசாளஞ்சேர்த்து

அதிரவெள்ளினெண்ணெய் கொத்துவிட்டுக்காய்ச்சி

யதைமெழுகு பதமாக வடித்துவார்த்து

முதிரநன்றாய் முழுகிவரிற்றீர் வியாதி

மொழிந்திடுநேத்திர வாதங்கபாலவாதம்

பிதிர் கிரந்தி காசமுடன் கபாலங் கண்ணோய்

பிறங்குகதிர் முன்பனி போற் பிரிந்துபோமே.

வேர்சரக்குகளை தனித்து எடுத்து கல்வத்திலரைத்தும் குங்குமப்பூ தவிர்ந்த மற்றைய சரக்குகளையும் இதனுடன் சேர்த்தரைத்து கற்கமாக எடுத்தல் வேண்டும். இவற்றை முன்கூறிய சாற்றுடன் கலந்து கசாளமாக்கி இளநீர், பால் கலந்து ஒரு கொத்து (600மிலீ) நல்லெண்ணெய் கலந்து காய்ச்சி மெழுகு பதத்தில் இறக்கும்போது குங்குமபடபூவையும் சேர்த்து வடிக்க வேண்டும்.

இத்தைலத்தை கிரமமாக தலைக்கு வைத்து முழுகிவர வேண்டும். இவ்வாறு செய்த வர சொல்லப்பட்ட நேத்திரவாதம், கபாலவாதம், கிரந்தி நோய்கள், கண்களில் வரும் காசம், மற்றும் கண் நோய்கள் யாவும் விட்டு நீங்கும். ஒளி விளங்கும் சூரியனின் முன் பனிபோல் மறைந்துவிடும்.

“செகராச சேகரத்தில்” வாதரோகங்கள் …… 05

04.நேத்திர வாதம்.

“கண்ணிற்கடுத்துக் குத்திக் கலங்கி நீர்சிவந்து வீழ்ந்து

நண்ணியமுகமுமூக்கும் நயனமும் புறத்தேவாங்கும்

பண்ணிகர் மொழியாற்சற்றே பகர்தலைவலியுமுண்டாம்

எண்ணிநேத்திரவாதத்தின் குணமிதென்றியம்பினாரே”

கண்கள் கடுத்துக்குத்தும், சிவந்து கலங்கி கண்ணீர் வடியும், முகம், மூக்கு கண்ணும் புறத்தில் வலிக்கும். தலைவலியும் உண்டாகும் இவையாவும் நேத்திர வாதகுணங்களாகும் என வைத்திய அறிஞர் இயம்பினார்கள் என்பதை பண்ணினை ஒத்த மொழிபேசும் பாவையே அறிக.

“ஒளிநிறைவிழியிற்குத்தோ டுடன்தலைவலியுண்டாகி

வளமிகுகண்பஞ்சாடி மறைந்து நீர்கடுத்துவீழும்

அளிநிறைகுழலாய் பின்னு மம்பகஞ் சுழித்துவாங்கும்

குளிருநேத்திரவாதத்தின் குணமிதென்றியம்பினாரே.”

ஒளி விளங்குங்கண்களில் குத்துண்டாகும். தலைவலி ஏற்படும், கண் மின்னும், பார்வை தெளிவில்லாது கலக்கமாயிருக்கும், கண்கள் கடுத்து கண்ணீர் வரும், கண்களின் பக்கங்களில் வலியுடன் வாங்கல் ஏற்படும் நேத்திர வாதத்தின் குணங்கள். இவையும் என எடுத்துரைத்தனர் என்பதை வண்டு மொய்க்கும் கூந்தலையுடைய பெண்ணே இதனை அறிந்துகொள்.

நேத்திர வாதத்துக்கு மருந்துகள்

தொடரும்…….

“செகராச சேகரத்தில்” வாதரோகங்கள் …… 04


03. சூரிய வாதம்

“தலைகனத்துச் சுழற்றியுடனக் கமுண்டாய்ச்

சாற்றிடிலுட்டணவேர் வையதிகமாகி

நிலைகனத்து நாசடைத்தும் மியூர்ந்து

நீர்விழுந்து உளைந்து குத்திவலியுண்டாகும்

கலைகனத் தகிரணமதிமுகத் தைவெல்லுங்

கணையெனநல் விழிபடைத் தகமலமின்னே

மலைகனத் தகொடுமுடிசே ருதயமீது

மருவிடுசூரியவாதம் மகிழ்ந்துகாணே”

 

தலைகனக்கும், சுற்றும், நடுக்கம் வரும், மேலும் உடல் உஸ்ணத்துடன் வியர்வை அதிகமாகவரும். நாசியடைக்கும், தும்மலும் ஏற்படும், நாசியில் ஊர்வதுபோன்ற உணர்வுடன் நீர்விழும், நாசியுளைவுடன் குத்தி வலிக்கும். பூரண கலைநிறைந்த சந்திரனின் முகத்தையும் வெல்லும் அழகுடையவளும், அம்புபோல் கூரிய விழியுடைய தாமரைபோன்ற மென்மையான பெண்ணே, கொடுமுடியுடைய மேருமலையில் உதயமாகும் சூரியன் தோன்றும் என்பதை மகிழ்ச்சியுடன் காண்பாய். அதாவது சூரியன் உதயமாகும்போது கூரியவாதம் ஏற்பட்டு அஸ்தமிக்கும் போது விட்டு நீங்கும். பகலில் இருக்கும். இரவில் இராது.

“சூரியவாதந் தோன்றிற் றும்மலுஞ் சலமுமூர்வும்

பாரிதாய்த் தலைகனத்துப் பரந்துடலிற்வேர்த்து

சீரிடாதடைத்துநாசி சீந்திடவலிப்புமுண்டாய்

சாரியாய்த் தலைநடுக்குஞ் சாற்றுஞ்சூரியவாதந்தான்”

சூரியவாதந் தோன்றினால் தும்மலும் மூக்குச் சிந்தும் தலைவலிக்கும் இரு கன்னப் பக்கங்களிலும் குத்து ஏற்படும். உடல் வியர்க்கும். நாசியடைக்கும். நீர் சிந்த வலியும் ஏற்படும். தலை சுற்றும் தலைச்சுற்றுடன் தலை நடுக்கமும் வரும். இக்குணங்கள் ஏற்பட்டால் சூரியவாதம் என்று கொள்ளலாம்.

மருந்து,

“ஆனதையறிந்துநீயும் அஞ்சிலைநொச்சிவேளை

தேனதில்வரிக்கற்றாளை தேட்கடைசிற்றாமட்டி

ஊனதிலழிஞ்சிலத்தி யுரியதோரமுக்கிராய்வேர்

கானதிற்குறிஞ்சிவேருங் கருநொச்சிவேருங்கூட்டே”

மேற்கூறிய குணங்களைக் கண்டு பயப்படாதே. இதற்கு மருந்தாக நொச்சி, தயிர்வேளை, பிள்ளைக்கத்தாளை, தேள்கொடுக்கி, சிற்றாமட்டி, அழிஞ்சில், அத்தி, அமுக்கிரா, சிறுகுறிஞ்சாவேர், கருநொச்சிவேர், இவை வகைக்கு ஒரு கழஞ்சு எடுத்து பொடித்து,

“கூட்டுநீயேலங்கோட்டங் குளவிந்தமரத்தைகுக்கி

லீட்டுசாதிக்காய்நெல்லி யியற்கராம்புடன்கச்சோலம்

நாட்டியவசம்புமஞ்சள் நற்பூதவிருக்க முள்ளி

தீட்டுநல்லெண்ணெய்நாழி திகழ்பசுப்பாலுநாழி”

முன்கூறிய சரக்குடன் ஏலம், கோட்டம், குளவிந்தம்,சித்தரத்தை, குக்கில், சாதிக்காய், நெல்லிமுள்ளி, கராம்பு, கச்சோலம், வசம்பு, மஞ்சள், பீநாறி, உள்ளி, வகை ஒருகழஞ்சு எடுத்துப் பொடித்து இருவகைத் தூள்களையும் கலந்து ஒருநாழி நல்லெண்ணெய் ஒரு நாழி பசுப்பாலும் கலந்து (600மி.லீ)

“நாளிருநாலுமூறி நாட்டுநற்சரக்கும்வேருந்

தூளிதாயரைத்துவிட்டே துகழறுமந்தபாகங்

கோளிலாதறவடித்துக் குலவியசிரத்தில் வார்க்க

கேளில் சூரியவாதந்தான் கெடிகெடவோடுங்காணே”

எட்டுநாட்களுக்கு இக்கசாயத்தை ஊறவிட்டு சரக்குகளையும் வேர்ச்சரக்குத்தூள்களையும் ஒன்றாக கலக்கி மணற்பாகமாக எரித்து வடித்து எடுக்க வேண்டும்.இத்தைலத்தை தலைக்கு வைத்துவர சூரியவாதம் பயந்து விட்டு நீங்கும்.